meri nazar ka muddaa uske siwa kuchh bhi nahin

merī nazar kā mudda.ā us ke sivā kuchh bhī nahīñ

us ne kahā kyā baat hai maiñ ne kahā kuchh bhī nahīñ

har zehn ko saudā huā har aañkh ne kuchh paḌh liyā

lekin sar-e-qirtās-e-jāñ maiñ ne likhā kuchh bhī nahīñ

dīvār-e-shahr-e-asr par kyā qāmateñ chaspāñ huiiñ

koshish to kuchh maiñ ne bhī kī lekin banā kuchh bhī nahīñ

jis se na kahnā thā kabhī jis se chhupānā thā sabhī

sab kuchh usī se kah diyā mujh se kahā kuchh bhī nahīñ

chalnā hai rāh-e-zīst meñ apne hī saath ek umr tak

kahne ko hai ik vāqi.a aur vāqi.a kuchh bhī nahīñ

ab ke bhī ik āñdhī chalī ab ke bhī sab kuchh uḌ gayā

ab ke bhī sab bāteñ huiiñ lekin huā kuchh bhī nahīñ

dil ko bachāne ke liye jaañ ko sipar karte rahe

logoñ se āḳhir kyā kaheñ 'shahpar' bachā kuchh bhī nahīñ

meri nazar ka muddaa us ke siwa kuchh bhi nahin

us ne kaha kya baat hai main ne kaha kuchh bhi nahin

har zehn ko sauda hua har aankh ne kuchh paDh liya

lekin sar-e-qirtas-e-jaan main ne likha kuchh bhi nahin

diwar-e-shahr-e-asr par kya qamaten chaspan huin

koshish to kuchh main ne bhi ki lekin bana kuchh bhi nahin

jis se na kahna tha kabhi jis se chhupana tha sabhi

sab kuchh usi se kah diya mujh se kaha kuchh bhi nahin

chalna hai rah-e-zist mein apne hi sath ek umr tak

kahne ko hai ek waqia aur waqia kuchh bhi nahin

ab ke bhi ek aandhi chali ab ke bhi sab kuchh uD gaya

ab ke bhi sab baaten huin lekin hua kuchh bhi nahin

dil ko bachane ke liye jaan ko sipar karte rahe

logon se aaKHir kya kahen 'shahpar' bacha kuchh bhi nahin