meri rahon mein kai marhale dushwar aae

merī rāhoñ meñ ka.ī marhale dushvār aa.e

dair aayā haram aayā rasan-o-dār aa.e

jalva-gāhoñ meñ abhī sham-e-yaqīñ jalne do

kyā ajab hai jo koī tālib-e-dīdār aa.e

mahfil-e-nāz ke ādāb haiñ sab par lāzim

koī dīvāna yahāñ aa.e ki hoshyār aa.e

ishq meñ vus.at-e-kaunain se shā.ista guzar

kyā ḳhabar hai ki kahāñ jalva-gah-e-yār aa.e

sāz-e-hastī meñ vo soz-e-abadī paidā kar

dil ke TuuTe hue tāroñ se bhī jhankār aa.e

mauj-o-sāhil mah-o-anjum gul-o-lāla dekhe

jab kahīñ tujh ko na paayā to sar-e-dār aa.e

lazzat-e-dard nahīñ sab ke muqaddar meñ 'qamar'

jis ke hissa meñ bhī ye daulat-e-bedār aa.e

meri rahon mein kai marhale dushwar aae

dair aaya haram aaya rasan-o-dar aae

jalwa-gahon mein abhi sham-e-yaqin jalne do

kya ajab hai jo koi talib-e-didar aae

mahfil-e-naz ke aadab hain sab par lazim

koi diwana yahan aae ki hoshyar aae

ishq mein wusat-e-kaunain se shaista guzar

kya KHabar hai ki kahan jalwa-gah-e-yar aae

saz-e-hasti mein wo soz-e-abadi paida kar

dil ke TuTe hue taron se bhi jhankar aae

mauj-o-sahil mah-o-anjum gul-o-lala dekhe

jab kahin tujh ko na paya to sar-e-dar aae

lazzat-e-dard nahin sab ke muqaddar mein 'qamar'

jis ke hissa mein bhi ye daulat-e-bedar aae