meri ruswai ka yun jashn manaya tumne

merī rusvā.ī kā yuuñ jashn manāyā tum ne

ret par naam likhā aur miTāyā tum ne

fikr kī dhuup meñ jhulsī huuñ ka.ī sadiyoñ tak

maiñ ne paayā hai tumheñ mujh ko na paayā tum ne

maiñ ne jab chāhā bhulā duuñ tirī yādoñ ko tabhī

pyaar kā giit mujhe aa ke sunāyā tum ne

ishq ne sudh hī bhulā dī thī mire tan man kī

TuuT hī jaatī magar mujh ko bachāyā tum ne

vaqt ne mujh se usī vaqt hañsī chhīnī hai

jab bhī rotī huī āñkhoñ ko hañsāyā tum ne

ehtiyātoñ ne mire paaoñ vahīñ rok liye

jab mirī samt kabhī haath baḌhāyā tum ne

meri ruswai ka yun jashn manaya tum ne

ret par nam likha aur miTaya tum ne

fikr ki dhup mein jhulsi hun kai sadiyon tak

main ne paya hai tumhein mujh ko na paya tum ne

main ne jab chaha bhula dun teri yaadon ko tabhi

pyar ka git mujhe aa ke sunaya tum ne

ishq ne sudh hi bhula di thi mere tan man ki

TuT hi jati magar mujh ko bachaya tum ne

waqt ne mujh se usi waqt hansi chhini hai

jab bhi roti hui aankhon ko hansaya tum ne

ehtiyaton ne mere paon wahin rok liye

jab meri samt kabhi hath baDhaya tum ne