meri si tu ne gul se na gar ai saba kahi

merī sī tū ne gul se na gar ai sabā kahī

maiñ bhī lagā duuñ aag gulistāñ ko tū sahī

go sub.h duur hai shab-e-hijrāñ kī lek tū

apnī taraf se tū na kar ai nāla-go tahī

zālim phirā mizāj na terā ġhurūr se

insāf kar tū maiñ tirī kyā kyā jafā sahī

latmoñ se bahr-e-husn ke hai zulf kā ye rañg

lahroñ meñ jaise phirtī ho nāgin bahī bahī

allāh-re ro.ab-e-husn ki us but ke sāmne

aa.ī jo baat dil se zabāñ par vahīñ rahī

ham us farīq meñ nahīñ vo aur log haiñ

duniyā ke nek-o-bad se jo rakhte haiñ āgahī

sad-āfrīñ ki bahr meñ 'saudā' kī 'mus.hafī'

ik tū ne āb-dār ġhazal aur bhī kahī

meri si tu ne gul se na gar ai saba kahi

main bhi laga dun aag gulistan ko tu sahi

go subh dur hai shab-e-hijran ki lek tu

apni taraf se tu na kar ai nala-go tahi

zalim phira mizaj na tera ghurur se

insaf kar tu main teri kya kya jafa sahi

latmon se bahr-e-husn ke hai zulf ka ye rang

lahron mein jaise phirti ho nagin bahi bahi

allah-re roab-e-husn ki us but ke samne

aai jo baat dil se zaban par wahin rahi

hum us fariq mein nahin wo aur log hain

duniya ke nek-o-bad se jo rakhte hain aagahi

sad-afrin ki bahr mein 'sauda' ki 'mushafi'

ek tu ne aab-dar ghazal aur bhi kahi