meri soi hui qismat ka sitara jaga

merī soī huī qismat kā sitārā jaagā

yā shab-e-ġham tirī yādoñ kā ujālā jaagā

oḌh kar so ga.e ham hijr kī lambī chādar

jab na imkān tire shām-e-milan kā jaagā

niiñd kī god meñ sar jaise hī maiñ ne rakkhā

be-qarārī kā mirī aañkh meñ sahrā jaagā

man kī jaagī huī ḳhvāhish ko sulāyā jis ne

us ke nirvān kā ek ek darīchā jaagā

hashr meñ mere gunah kyā hue dāmānda-qadam

dast-e-rahmat kā mire sar pe sahārā jaagā

kaam mushkil se bhī mushkil huā āsān bahut

jis ghaḌī paikar-e-ḳhākī meñ irāda jaagā

dar-e-ma.amūl pe sailāb ne dastak kyā dī

aañkh milte hue dariyā kā kinārā jaagā

shab ne ārām kā bistar hī lagāyā thā abhī

yak-ba-yak niiñd se 'maqsūd' saverā jaagā

meri soi hui qismat ka sitara jaga

ya shab-e-gham teri yaadon ka ujala jaga

oDh kar so gae hum hijr ki lambi chadar

jab na imkan tere sham-e-milan ka jaga

nind ki god mein sar jaise hi main ne rakkha

be-qarari ka meri aankh mein sahra jaga

man ki jagi hui KHwahish ko sulaya jis ne

us ke nirwan ka ek ek daricha jaga

hashr mein mere gunah kya hue damanda-qadam

dast-e-rahmat ka mere sar pe sahaara jaga

kaam mushkil se bhi mushkil hua aasan bahut

jis ghaDi paikar-e-KHaki mein irada jaga

dar-e-mamul pe sailab ne dastak kya di

aankh milte hue dariya ka kinara jaga

shab ne aaram ka bistar hi lagaya tha abhi

yak-ba-yak nind se 'maqsud' sawera jaga