meri tujhse kya Takkar hai

merī tujh se kyā Takkar hai

maiñ ik shai tū saudāgar hai

ḳhvābo tum āhista aanā

merī niiñd kā pul jarjar hai

ġhāfil rahne do bachchoñ ko

phir to aage Dar hī Dar hai

dukhiyāroñ kī is bastī ke

har ghar meñ ik pūjā-ghar hai

shaam meñ din tabdīl huā ab

ab har saaya qad-āvar hai

achchhe muuD meñ hai vo dil kī

kahne kā achchhā avsar hai

haath milāo ahl-e-mohabbat

nafrat kaafī tāqat-var hai

sach mat bolo us pāgal se

us ke hāthoñ meñ patthar hai

ġhībat kī is āb-o-havā meñ

'saurabh' kā rahnā dūbhar hai

meri tujh se kya Takkar hai

main ek shai tu saudagar hai

KHwabo tum aahista aana

meri nind ka pul jarjar hai

ghafil rahne do bachchon ko

phir to aage Dar hi Dar hai

dukhiyaron ki is basti ke

har ghar mein ek puja-ghar hai

sham mein din tabdil hua ab

ab har saya qad-awar hai

achchhe muD mein hai wo dil ki

kahne ka achchha awsar hai

hath milao ahl-e-mohabbat

nafrat kafi taqat-war hai

sach mat bolo us pagal se

us ke hathon mein patthar hai

ghibat ki is aab-o-hawa mein

'saurabh' ka rahna dubhar hai