meri wafa na dekh tu apni ata shumar kar

merī vafā na dekh tū apnī 'atā shumār kar

aap hī sharmsār ho yā mujhe sharmsār kar

parda-e-shab se pau phaTī sub.h ko pur-vaqār kar

qalb-o-nazar ko de jilā baḳht ko tābdār kar

sun le payām-e-sāl-e-nau aur na intizār kar

hosh-o-ḳhirad ko de sadā vaqt ko sāzgār kar

mahv-e-fuġhān-e-ārzū hosh se ham-kanār kar

naġhma-e-nau-bahār se ziist ko pur-bahār kar

ġham kī sadā jo aa ga.ī bazm-e-tarab meñ hai muḳhil

ġhairat-e-husn hai agar 'ishq se ham-kanār kar

‘aish-o-nishāt ḳhud-baḳhud qadmoñ pe sar jhukā.eñge

ātish-e-ġham ko de havā aah ko sho’la-zār kar

tujh ko agar yaqīñ hai ye munsif-o-haq-nigar hai vo

shikva-e-jaur ham-nafas shauq se baar baar kar

ḳhvāb se jaag nāsehā shams-e-'amal huā tulū’

ḳhud ko banā vafā-numā kār-e-sad-iftiḳhār kar

'alvī'-e-zār tark kar āh-o-fuġhāñ kā silsila

jis se sukūñ nasīb ho raah vo iḳhtiyār kar

meri wafa na dekh tu apni 'ata shumar kar

aap hi sharmsar ho ya mujhe sharmsar kar

parda-e-shab se pau phaTi subh ko pur-waqar kar

qalb-o-nazar ko de jila baKHt ko tabdar kar

sun le payam-e-sal-e-nau aur na intizar kar

hosh-o-KHirad ko de sada waqt ko sazgar kar

mahw-e-fughan-e-arzu hosh se ham-kanar kar

naghma-e-nau-bahaar se zist ko pur-bahaar kar

gham ki sada jo aa gai bazm-e-tarab mein hai muKHil

ghairat-e-husn hai agar 'ishq se ham-kanar kar

‘aish-o-nishat KHud-baKHud qadmon pe sar jhukaenge

aatish-e-gham ko de hawa aah ko sho’la-zar kar

tujh ko agar yaqin hai ye munsif-o-haq-nigar hai wo

shikwa-e-jaur ham-nafas shauq se bar bar kar

KHwab se jag naseha shams-e-'amal hua tulu’

KHud ko bana wafa-numa kar-e-sad-iftiKHar kar

'alwi'-e-zar tark kar aah-o-fughan ka silsila

jis se sukun nasib ho rah wo iKHtiyar kar