miThe chashmon se KHunuk chhanw se dur

mīThe chashmoñ se ḳhunuk chhāñv se duur

zaḳhm khulte haiñ tire gaañv se duur

sañg-e-manzil ne lahū uglā hai

duur ham bādiya-paimāoñ se duur

kitnī sham.eñ haiñ asīr-e-fānūs

kitne yūsuf haiñ zuleḳhāoñ se duur

kisht-e-ummīd sulagtī hī rahī

abr barsā bhī to sahrāoñ se duur

jaur-e-hālāt bhalā ho terā

chain miltā hai shanāsāoñ se duur

jannat-e-fikr bulātī hai chalo

dair-o-ka.aba se kalīsāoñ se duur

raqs-e-āshuftā-sarāñ dekheñge

duur in anjuman-ārāoñ se duur

justujū hai dur-e-yaktā kī 'shakeb'

sīpiyāñ chunte haiñ dariyāoñ se duur

miThe chashmon se KHunuk chhanw se dur

zaKHm khulte hain tere ganw se dur

sang-e-manzil ne lahu ugla hai

dur hum baadiya-paimaon se dur

kitni shamen hain asir-e-fanus

kitne yusuf hain zuleKHaon se dur

kisht-e-ummid sulagti hi rahi

abr barsa bhi to sahraon se dur

jaur-e-haalat bhala ho tera

chain milta hai shanasaon se dur

jannat-e-fikr bulati hai chalo

dair-o-kaba se kalisaon se dur

raqs-e-ashufta-saran dekhenge

dur in anjuman-araon se dur

justuju hai dur-e-yakta ki 'shakeb'

sipiyan chunte hain dariyaon se dur