mizan-e-waqiat mein tola nahin gaya

mīzān-e-vāqi.āt meñ tolā nahīñ gayā

itnā vo nā-sipās thā likkhā nahīñ gayā

ḳhushbū kī aarzū meñ sazā qaid kī huī

sahrā uThā ke laa.e to pūchhā nahīñ gayā

yuuñ bhī maiñ apne baare meñ kuchh likh nahīñ sakā

lafzoñ kā shor aisā thā sochā nahīñ gayā

donoñ ko fart-e-shauq ne lab-basta kar diyā

vo chup rahā to ham se bhī bolā nahīñ gayā

qarz-e-firāq maiñ ne mukammal chukā diyā

lekin mire hisāb se kaaTā nahīñ gayā

kaise bhalā fasāne meñ sach kī talāsh ho

lafzoñ kā her-pher hī pakḌā nahīñ gayā

aise safar-nasīb haiñ pushtoñ se ham 'amīr'

ab tak hamāre paañv kā chhālā nahīñ gayā

mizan-e-waqiat mein tola nahin gaya

itna wo na-sipas tha likkha nahin gaya

KHushbu ki aarzu mein saza qaid ki hui

sahra uTha ke lae to puchha nahin gaya

yun bhi main apne bare mein kuchh likh nahin saka

lafzon ka shor aisa tha socha nahin gaya

donon ko fart-e-shauq ne lab-basta kar diya

wo chup raha to hum se bhi bola nahin gaya

qarz-e-firaq main ne mukammal chuka diya

lekin mere hisab se kaTa nahin gaya

kaise bhala fasane mein sach ki talash ho

lafzon ka her-pher hi pakDa nahin gaya

aise safar-nasib hain pushton se hum 'amir'

ab tak hamare panw ka chhaala nahin gaya