mil jae mai to sajda-e-shukrana chahiye

mil jaa.e mai to sajda-e-shukrāna chāhiye

piite hī ek laġhzish-e-mastāna chāhiye

haañ ehtirām-e-ka.aba-o-but-ḳhāna chāhiye

maz.hab kī pochhiye to judāgāna chāhiye

rindān-e-mai-parast siya-mast hī sahī

ai shaiḳh guftugū to sharīfāna chāhiye

dīvāngī hai aql nahīñ hai ki ḳhaam ho

dīvāna har lihāz se dīvāna chāhiye

is zindagī ko chāhiye sāmān-e-zindagī

kuchh bhī na ho to shīsha-o-paimāna chāhiye

o nañg-e-e.atibār duā par na rakh madār

o bevaqūf himmat-e-mardāna chāhiye

rahne de jām-e-jam mujhe anjām-e-jam sunā

khul jaa.e jis se aañkh vo afsāna chāhiye

mil jae mai to sajda-e-shukrana chahiye

pite hi ek laghzish-e-mastana chahiye

han ehtiram-e-kaba-o-but-KHana chahiye

mazhab ki pochhiye to judagana chahiye

rindan-e-mai-parast siya-mast hi sahi

ai shaiKH guftugu to sharifana chahiye

diwangi hai aql nahin hai ki KHam ho

diwana har lihaz se diwana chahiye

is zindagi ko chahiye saman-e-zindagi

kuchh bhi na ho to shisha-o-paimana chahiye

o nang-e-eatibar dua par na rakh madar

o bewaquf himmat-e-mardana chahiye

rahne de jam-e-jam mujhe anjam-e-jam suna

khul jae jis se aankh wo afsana chahiye