mil jaega tera koi hamnam kisi roz

mil jā.egā terā koī hamnām kisī roz

aa jā.egā bīmār ko ārām kisī roz

sunte haiñ ki āñkhoñ meñ bhī nashsha to bahut hai

bhar do nā nigāhoñ se mirā jaam kisī roz

likkhe na agar ham ne bhī ulfat ke tarāne

ho jā.eñge ham log bhī gumnām kisī roz

tum baiThnā sharmā ke zarā der ko aage

maiñ tum ko nihārūñgā sar-e-shām kisī roz

kyā lutf ye detā hai mire naam ke pīchhe

dekhūñgā lagā kar maiñ tirā naam kisī roz

barbād chaman kar ke tū ḳhush hai to zarā sun

dekhegā jahāñ terā bhī anjām kisī roz

badnām jo karte haiñ hameñ un ko batā do

ho jā.eñge maqsad meñ vo nākām kisī roz

kahtā hai 'asad' dil ye use apnā banā le

bhejūñgā use dil kā ye paiġhām kisī roz

mil jaega tera koi hamnam kisi roz

aa jaega bimar ko aaram kisi roz

sunte hain ki aankhon mein bhi nashsha to bahut hai

bhar do na nigahon se mera jam kisi roz

likkhe na agar hum ne bhi ulfat ke tarane

ho jaenge hum log bhi gumnam kisi roz

tum baiThna sharma ke zara der ko aage

main tum ko nihaarunga sar-e-sham kisi roz

kya lutf ye deta hai mere nam ke pichhe

dekhunga laga kar main tera nam kisi roz

barbaad chaman kar ke tu KHush hai to zara sun

dekhega jahan tera bhi anjam kisi roz

badnam jo karte hain hamein un ko bata do

ho jaenge maqsad mein wo nakaam kisi roz

kahta hai 'asad' dil ye use apna bana le

bhejunga use dil ka ye paigham kisi roz