mila bhi zist mein kya ranj-e-rah-guzar se kam

milā bhī ziist meñ kyā ranj-e-rah-guzār se kam

so apnā shauq-e-safar bhī nahīñ ġhubār se kam

tire firāq meñ dil kā ajiib aalam hai

na kuchh ḳhumār se baḌh kar na kuchh ḳhumār se kam

hañsī-ḳhushī kī rafāqat kisī se kyā chāheñ

yahāñ to miltā nahīñ koī ġham-gusār se kam

vo muntazir hai yaqīnan havā-e-sarsar kā

jo habs ho na sakā bād-e-nau-bahār se kam

bulandiyoñ ke safar meñ qadam zamīñ pe raheñ

ye taḳht-o-tāj bhī hote nahīñ haiñ daar se kam

ajiib rañgoñ se mujh ko sañvār detī hai

ki vo nigāh-e-satā.ish nahīñ siñghār se kam

mirī anā hī sadā darmiyāñ rahī haa.el

vagarna kuchh bhī nahīñ mere iḳhtiyār se kam

vo jañg jis meñ muqābil rahe zamīr mirā

mujhe vo jiit bhī 'amabar' na hogī haar se kam

mila bhi zist mein kya ranj-e-rah-guzar se kam

so apna shauq-e-safar bhi nahin ghubar se kam

tere firaq mein dil ka ajib aalam hai

na kuchh KHumar se baDh kar na kuchh KHumar se kam

hansi-KHushi ki rafaqat kisi se kya chahen

yahan to milta nahin koi gham-gusar se kam

wo muntazir hai yaqinan hawa-e-sarsar ka

jo habs ho na saka baad-e-nau-bahaar se kam

bulandiyon ke safar mein qadam zamin pe rahen

ye taKHt-o-taj bhi hote nahin hain dar se kam

ajib rangon se mujh ko sanwar deti hai

ki wo nigah-e-sataish nahin singhaar se kam

meri ana hi sada darmiyan rahi hael

wagarna kuchh bhi nahin mere iKHtiyar se kam

wo jang jis mein muqabil rahe zamir mera

mujhe wo jit bhi 'amabar' na hogi haar se kam