milā-dilā sahī ik ḳhushk haar baaqī hai
abhī bahār-e-shikast-e-bahār baaqī hai
nazar sañvār chukī kitne ā.ina-ḳhāne
usī tarah havas-e-dīd-e-yār baaqī hai
bichhaunā kāñToñ kā hai phir bhī aa.ī jaatī hai niiñd
abhī tasavvur-e-zānū-e-yār baaqī hai
shikast-e-ahd ke kyuuñ hoñ na silsile qaa.em
ik aasrā pas-e-har-e'tibār baaqī hai
qafas meñ fursat-e-fikr-e-chaman-tarāz kahāñ
yahī bahut hai ḳhayāl-e-bahār baaqī hai
vo āñkheñ bhī khulīñ badlī jo vaqt ne karvaT
idhar nahīñ ab idhar intizār baaqī hai
ye rūh-o-tan kī judā.ī kā marsiya kab tak
vahī do-rañgī-e-lail-o-nahār baaqī hai
chaman to nīm-nigāhī ne kar diyā taqsīm
ḳhudā-e-vaqt koī aur vaar baaqī hai
'sirāj' ab bhī ye aqlīm-e-rañg-o-bū hai bahut
luTī-luTā.ī huī jo bahār baaqī hai
mila-dila sahi ek KHushk haar baqi hai
abhi bahaar-e-shikast-e-bahaar baqi hai
nazar sanwar chuki kitne aaina-KHane
usi tarah hawas-e-did-e-yar baqi hai
bichhauna kanTon ka hai phir bhi aai jati hai nind
abhi tasawwur-e-zanu-e-yar baqi hai
shikast-e-ahd ke kyun hon na silsile qaem
ek aasra pas-e-har-e'tibar baqi hai
qafas mein fursat-e-fikr-e-chaman-taraaz kahan
yahi bahut hai KHayal-e-bahaar baqi hai
wo aankhen bhi khulin badli jo waqt ne karwaT
idhar nahin ab idhar intizar baqi hai
ye ruh-o-tan ki judai ka marsiya kab tak
wahi do-rangi-e-lail-o-nahaar baqi hai
chaman to nim-nigahi ne kar diya taqsim
KHuda-e-waqt koi aur war baqi hai
'siraj' ab bhi ye aqlim-e-rang-o-bu hai bahut
luTi-luTai hui jo bahaar baqi hai
Source:
Shola-e-Aawaz (Pg. e-146 p-145)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.