mila hai jism ki us ka guman mila hai mujhe

milā hai jism ki us kā gumāñ milā hai mujhe

vo haath aa ke bhī aksar kahāñ milā hai mujhe

maiñ sirf dekh hī saktā huuñ chashm-e-sāhil se

ki vo badan ajab āb-e-ravāñ milā hai mujhe

faroḳht kar ke ḳhasāre meñ aa gayā bāzār

to soch lo ki vo kitnā garāñ milā hai mujhe

achānak aaj mirā zaḳhm baat karne lagā

bahut dinoñ meñ koī ham-zabāñ milā hai mujhe

hamesha der se pahuñchā maiñ us kī mahfil meñ

bajā.e aag hamesha dhuāñ milā hai mujhe

ajab kashākash-e-īmān-o-kufr rahtī hai

vo but hamesha ba-vaqt-e-azāñ milā hai mujhe

ulaT ke rakh diyā 'ehsās' ne hisāb-e-umr

vo roz kal se ziyāda javāñ milā hai mujhe

mila hai jism ki us ka guman mila hai mujhe

wo hath aa ke bhi aksar kahan mila hai mujhe

main sirf dekh hi sakta hun chashm-e-sahil se

ki wo badan ajab aab-e-rawan mila hai mujhe

faroKHt kar ke KHasare mein aa gaya bazar

to soch lo ki wo kitna garan mila hai mujhe

achanak aaj mera zaKHm baat karne laga

bahut dinon mein koi ham-zaban mila hai mujhe

hamesha der se pahuncha main us ki mahfil mein

bajae aag hamesha dhuan mila hai mujhe

ajab kashakash-e-iman-o-kufr rahti hai

wo but hamesha ba-waqt-e-azan mila hai mujhe

ulaT ke rakh diya 'ehsas' ne hisab-e-umr

wo roz kal se ziyaada jawan mila hai mujhe