mila jo Khaar to dil mein biTha liya maine

milā jo ḳhaar to dil meñ biThā liyā maiñ ne

har ek phuul se dāman bachā liyā maiñ ne

nazar meñ un kā sarāpā basā liyā maiñ ne

ġham-e-firāq ko āsāñ banā liyā maiñ ne

na pūchh mujh se mire fart-e-shauq kā aalam

har ek ġham ko tirā ġham banā liyā maiñ ne

bhaḌak ke bujh gayā jab us kā har ek diyā

charāġh-e-dil ko shab-e-ġham jalā liyā maiñ ne

ye kyā ḳhabar thī dahakte hue haiñ añgāre

samajh ke phuul jinheñ sar chaḌhā liyā maiñ ne

fareb-kār rafīqoñ kī ab nahīñ hājat

ki apne siine se ġham ko lagā liyā maiñ ne

samajh liyā jise auroñ ne 'ashk' nā-mumkin

usī ko apnī tamannā banā liyā maiñ ne

mila jo KHar to dil mein biTha liya main ne

har ek phul se daman bacha liya main ne

nazar mein un ka sarapa basa liya main ne

gham-e-firaq ko aasan bana liya main ne

na puchh mujh se mere fart-e-shauq ka aalam

har ek gham ko tera gham bana liya main ne

bhaDak ke bujh gaya jab us ka har ek diya

charagh-e-dil ko shab-e-gham jala liya main ne

ye kya KHabar thi dahakte hue hain angare

samajh ke phul jinhen sar chaDha liya main ne

fareb-kar rafiqon ki ab nahin hajat

ki apne sine se gham ko laga liya main ne

samajh liya jise auron ne 'ashk' na-mumkin

usi ko apni tamanna bana liya main ne