mila ke hath masarrat kashid ki jae

milā ke haath masarrat kashīd kī jaa.e

vo sāmne nazar aa.e to 'iid kī jaa.e

junūn-e-'ishq kahāñ nāp-tol jaane hai

agar huī hai mohabbat shadīd kī jaa.e

vahāñ to amn ke sajdoñ kī nūr-pāshī thī

kahā thā kis ne ki masjid shahīd kī jaa.e

chalan vafā kā tumhārī sarisht meñ hī nahīñ

to kis umiid pe tum se umiid kī jaa.e

ḳhulūs-o-pyār se patthar pighalte dekhe haiñ

anā hai dushman-e-jānāñ murīd kī jaa.e

rivāyatoñ kā bhī apnā mizāj hai 'fārūq'

ġhazal zarūrī nahīñ hai jadīd kī jaa.e

mila ke hath masarrat kashid ki jae

wo samne nazar aae to 'id ki jae

junun-e-'ishq kahan nap-tol jaane hai

agar hui hai mohabbat shadid ki jae

wahan to amn ke sajdon ki nur-pashi thi

kaha tha kis ne ki masjid shahid ki jae

chalan wafa ka tumhaari sarisht mein hi nahin

to kis umid pe tum se umid ki jae

KHulus-o-pyar se patthar pighalte dekhe hain

ana hai dushman-e-jaanan murid ki jae

riwayaton ka bhi apna mizaj hai 'faruq'

ghazal zaruri nahin hai jadid ki jae