mila mujhse wo itni be-ruKHi se

milā mujh se vo itnī be-ruḳhī se

ki jaise ajnabī ik ajnabī se

mazammat sirf vo karte haiñ us kī

nahīñ vāqif jo ramz-e-āshiqī se

sar-e-fihrist haiñ ahl-e-ḳhirad kī

jinheñ nisbat nahīñ kuchh āgahī se

jo thā taqdīr meñ vo pesh aaya

shikāyat kyā karūñ ab maiñ kisī se

sunānā chāhtā huuñ dil kī bāteñ

magar Dartā huuñ un kī barhamī se

ġhubār-e-rāh se kah do ki chhaT jaa.e

nahīñ vāqif ye qais-e-āmirī se

yahāñ jab sair ko bhī ho sivāyā

to phir kam ḳhud ko kyoñ samjhūñ kisī se

samajhtā hai vahī rozī-rasāñ hai

tavaqqo aur kyā ho aadmī se

musībat meñ nahīñ koī kisī kā

milā 'ḳhāvar' sabaq ye dostī se

mila mujh se wo itni be-ruKHi se

ki jaise ajnabi ek ajnabi se

mazammat sirf wo karte hain us ki

nahin waqif jo ramz-e-ashiqi se

sar-e-fihrist hain ahl-e-KHirad ki

jinhen nisbat nahin kuchh aagahi se

jo tha taqdir mein wo pesh aaya

shikayat kya karun ab main kisi se

sunana chahta hun dil ki baaten

magar Darta hun un ki barhami se

ghubar-e-rah se kah do ki chhaT jae

nahin waqif ye qais-e-amiri se

yahan jab sair ko bhi ho siwaya

to phir kam KHud ko kyon samjhun kisi se

samajhta hai wahi rozi-rasan hai

tawaqqo aur kya ho aadmi se

musibat mein nahin koi kisi ka

mila 'KHawar' sabaq ye dosti se