mila to hadisa kuchh aisa dil KHarash hua

milā to hādisa kuchh aisā dil ḳharāsh huā

vo TuuT phuuT ke bikhrā maiñ paash paash huā

tamām umr hī apne ḳhilāf sāzish kī

vo ehtiyāt kī ḳhud par na raaz faash huā

sitam to ye hai vo farhād-e-vaqt hai jis ne

na jū-e-shīr nikālī na but-tarāsh huā

yahī to dukh hai burā.ī bhī qā.ede se na kī

na maiñ sharīf rahā aur na bad-ma.āsh huā

ho ek baar kā ronā to ro.uuñ bhī dil ko

ye aa.ina to ka.ī baar paash paash huā

balā kā habs thā 'sājid' havā kī bastī meñ

chalī jo saañs kī aarī maiñ qaash qaash huā

mila to hadisa kuchh aisa dil KHarash hua

wo TuT phuT ke bikhra main pash pash hua

tamam umr hi apne KHilaf sazish ki

wo ehtiyat ki KHud par na raaz fash hua

sitam to ye hai wo farhad-e-waqt hai jis ne

na ju-e-shir nikali na but-tarash hua

yahi to dukh hai burai bhi qaede se na ki

na main sharif raha aur na bad-maash hua

ho ek bar ka rona to roun bhi dil ko

ye aaina to kai bar pash pash hua

bala ka habs tha 'sajid' hawa ki basti mein

chali jo sans ki aari main qash qash hua