mile hain harf bas itne mujhe bayan ke liye

mile haiñ harf bas itne mujhe bayāñ ke liye

galī kī raushnī jaise kisī makāñ ke liye

chalo ki chal ke kisī dasht ko kareñ ābād

fazā-e-shahr to qātil hai jism-o-jāñ ke liye

hamāre dar kī sabhī dastakeñ rahīñ mahfūz

tamām-umr kisī dast-e-mehrbāñ ke liye

sabhī ko merī tarah ishq kā nahīñ idrāk

samundaroñ kā safar hai jahāz-rāñ ke liye

havā-e-bahr had-e-bahr se nikal na sakī

kabhī uThā jo koī abr shahr-e-jāñ ke liye

ajiib baat makīnoñ ko kuchh ḳhabar na huī

galī meñ boliyāñ lagtī rahīñ makāñ ke liye

usī jahāñ kī mohabbat meñ mar ga.e 'ḳhāvar'

kiyā na kaam koī tum ne is jahāñ ke liye

mile hain harf bas itne mujhe bayan ke liye

gali ki raushni jaise kisi makan ke liye

chalo ki chal ke kisi dasht ko karen aabaad

faza-e-shahr to qatil hai jism-o-jaan ke liye

hamare dar ki sabhi dastaken rahin mahfuz

tamam-umr kisi dast-e-mehrban ke liye

sabhi ko meri tarah ishq ka nahin idrak

samundaron ka safar hai jahaz-ran ke liye

hawa-e-bahr had-e-bahr se nikal na saki

kabhi uTha jo koi abr shahr-e-jaan ke liye

ajib baat makinon ko kuchh KHabar na hui

gali mein boliyan lagti rahin makan ke liye

usi jahan ki mohabbat mein mar gae 'KHawar'

kiya na kaam koi tum ne is jahan ke liye