mile hain log zamane mein be-usul mujhe

mile haiñ log zamāne meñ be-usūl mujhe

kiyā hai sūrat-e-hālāt ne malūl mujhe

jahāñ se sāhab-e-kirdār koī guzrā hai

bahut aziiz hai us rāste kī dhuul mujhe

jo haq kī raah meñ ḳhud ko miTānā jāntā ho

pasand aate haiñ us shaḳhs ke usuul mujhe

milī haiñ mujh ko virāsat meñ kuchh ajab qadreñ

samāj ne diye haiñ kāġhzī se phuul mujhe

sadā-e-haq mirī duniyā meñ dab ga.ī hai magar

nahīñ shikast kisī taur bhī qubūl mujhe

hai jo bhī dil meñ mire us pe ho sake zāhir

har ek baat ko denā paḌā hai tuul mujhe

maiñ sochtā thā mirā us se koī rishta nahīñ

kisī kī yaad magar kar ga.ī malūl mujhe

mile hain log zamane mein be-usul mujhe

kiya hai surat-e-haalat ne malul mujhe

jahan se sahab-e-kirdar koi guzra hai

bahut aziz hai us raste ki dhul mujhe

jo haq ki rah mein KHud ko miTana jaanta ho

pasand aate hain us shaKHs ke usul mujhe

mili hain mujh ko wirasat mein kuchh ajab qadren

samaj ne diye hain kaghzi se phul mujhe

sada-e-haq meri duniya mein dab gai hai magar

nahin shikast kisi taur bhi qubul mujhe

hai jo bhi dil mein mere us pe ho sake zahir

har ek baat ko dena paDa hai tul mujhe

main sochta tha mera us se koi rishta nahin

kisi ki yaad magar kar gai malul mujhe