mile jo gham bhi to usko barat KHushi ki tarah

mile jo ġham bhī to us ko barat ḳhushī kī tarah

guzār zindagī nādān zindagī kī tarah

jahāñ pe haq ho vahāñ haq kī baat kah diije

ḳhamosh rahnā bhī hai jurm ḳhud-kushī kī tarah

jahān-e-hirs-o-havas kā to hai gila tāham

mile haiñ mujh ko farishte bhī aadmī kī tarah

jo baat shīrīñ-bayānī kā aks rakhtī hai

vo baat dil meñ utartī hai raushnī kī tarah

vagarna rasm-e-jahāñ-dāri-e-hayāt nibhā

kisī ko chaah to phir chaah bandagī kī tarah

vafā kī hurmat-e-behad kā paas thā mujh ko

tumhāre shahr se guzrā huuñ ajnabī kī tarah

maiñ apnā aap mukammal vajūd huuñ 'shāriq'

mujhe ġharaz hī nahīñ hai banūñ kisī kī tarah

mile jo gham bhi to us ko barat KHushi ki tarah

guzar zindagi nadan zindagi ki tarah

jahan pe haq ho wahan haq ki baat kah dije

KHamosh rahna bhi hai jurm KHud-kushi ki tarah

jahan-e-hirs-o-hawas ka to hai gila taham

mile hain mujh ko farishte bhi aadmi ki tarah

jo baat shirin-bayani ka aks rakhti hai

wo baat dil mein utarti hai raushni ki tarah

wagarna rasm-e-jahan-dari-e-hayat nibha

kisi ko chah to phir chah bandagi ki tarah

wafa ki hurmat-e-behad ka pas tha mujh ko

tumhaare shahr se guzra hun ajnabi ki tarah

main apna aap mukammal wajud hun 'shaariq'

mujhe gharaz hi nahin hai banun kisi ki tarah