mili hai chhuTTi so tu bhi apnon ko ja milega

milī hai chhuTTī so tū bhī apnoñ ko jā milegā

hamārī āñkhoñ kā kī ḳhair phir jāgnā milegā

na aa.ine se hī ḳhud ye pūchheñ ki aap kyā haiñ

bahut mileñge magar kahāñ aap sā milegā

vo apnā haamī ye kah rahā thā ki terī ḳhātir

jo jañg huī to vo pahlī saf meñ khaḌā milegā

hamārī āñkhoñ se chain le kar tū so sakegā

tū hī batā tujh ko aisā karne se kyā milegā

charāġh-e-saharī sī dil kī hālat milegī tum ko

jo tum miloge to dil hamārā bujhā milegā

hazār rañgoñ kā ek sapnā sajā rahe ho

hazār rātoñ kā tohfatan ratjagā milegā

tumhārī āñkhoñ ke sabz rañgoñ meñ dilkashī hai

maiñ raat jaagā huuñ merī āñkhoñ meñ kyā milegā

hamārā chehrā udāsiyoñ se banā huā hai

hamāre chehre kā rañg aksar uḌā milegā

mili hai chhuTTi so tu bhi apnon ko ja milega

hamari aankhon ka ki KHair phir jagna milega

na aaine se hi KHud ye puchhen ki aap kya hain

bahut milenge magar kahan aap sa milega

wo apna hami ye kah raha tha ki teri KHatir

jo jang hui to wo pahli saf mein khaDa milega

hamari aankhon se chain le kar tu so sakega

tu hi bata tujh ko aisa karne se kya milega

charagh-e-sahari si dil ki haalat milegi tum ko

jo tum miloge to dil hamara bujha milega

hazar rangon ka ek sapna saja rahe ho

hazar raaton ka tohfatan ratjaga milega

tumhaari aankhon ke sabz rangon mein dilkashi hai

main raat jaga hun meri aankhon mein kya milega

hamara chehra udasiyon se bana hua hai

hamare chehre ka rang aksar uDa milega