milta hai mauj mauj mujhe tu kabhi kabhi

miltā hai mauj mauj mujhe tū kabhī kabhī

ubhrā hai terā aks lab-e-jū kabhī kabhī

paate haiñ kuchh gulāb Thikānoñ meñ parvarish

aatī hai pattharoñ se bhī ḳhushbū kabhī kabhī

ye bhī huā ki aañkh bhī pathrā ga.ī mirī

palkoñ pe jam ga.e mire aañsū kabhī kabhī

rakh sub.h-o-shām shāna-e-tadbīr haath meñ

hālāt ke bikharte haiñ gesū kabhī kabhī

ye bhī hai ik sitam tirī qurbat ke bāvajūd

miltā nahīñ sukūñ kisī pahlū kabhī kabhī

bhaTkī mirī nigāh bhī terī talāsh meñ

aañsū bane haiñ aañkh meñ aahū kabhī kabhī

maiñ sañg-e-dil nahīñ huuñ magar is ke bāvajūd

chaltā hai mujh pe husn kā jaadū kabhī kabhī

shabnam ba-dosh aa ke mujhe hausla bhī de

bād-e-sabā kī tarah mujhe chhū kabhī kabhī

'nāsir' mirī ġhazal ko bahāroñ kā bāñkpan

detī hai us kī jumbish-e-abrū kabhī kabhī

milta hai mauj mauj mujhe tu kabhi kabhi

ubhra hai tera aks lab-e-ju kabhi kabhi

pate hain kuchh gulab Thikanon mein parwarish

aati hai pattharon se bhi KHushbu kabhi kabhi

ye bhi hua ki aankh bhi pathra gai meri

palkon pe jam gae mere aansu kabhi kabhi

rakh subh-o-sham shana-e-tadbir hath mein

haalat ke bikharte hain gesu kabhi kabhi

ye bhi hai ek sitam teri qurbat ke bawajud

milta nahin sukun kisi pahlu kabhi kabhi

bhaTki meri nigah bhi teri talash mein

aansu bane hain aankh mein aahu kabhi kabhi

main sang-e-dil nahin hun magar is ke bawajud

chalta hai mujh pe husn ka jadu kabhi kabhi

shabnam ba-dosh aa ke mujhe hausla bhi de

baad-e-saba ki tarah mujhe chhu kabhi kabhi

'nasir' meri ghazal ko bahaaron ka bankpan

deti hai us ki jumbish-e-abru kabhi kabhi