milte hain shahr-e-yar mein manzar gulab ke

milte haiñ shahr-e-yār meñ manzar gulāb ke

sab sā.ebāñ gulāb ke sab dar gulāb ke

jab āftāb ḳhuuñ meñ nahāyā zavāl par

bādal lahū-lahū the ki lashkar gulāb ke

saayā kisī kā sehn-e-chaman par bikhar gayā

aur ban rahe haiñ baaġh meñ paikar gulāb ke

koī to rang-e-ātish-e-lab ko badal gayā

pahle the un ke hoñT barābar gulāb ke

yāqūt thā sharar the lahū thā ki āb-e-surḳh

āñkheñ thiiñ un kī yā ki the sāġhar gulāb ke

bhañvaroñ se pūchhe koī bhalā ras ko chhoḌ kar

kyā DhūñDte haiñ jaane vo andar gulāb ke

bulbul se koī kah de chaman meñ ki in dinoñ

'amrit' bhī ho ga.e haiñ suḳhanvar gulāb ke

milte hain shahr-e-yar mein manzar gulab ke

sab saeban gulab ke sab dar gulab ke

jab aaftab KHun mein nahaya zawal par

baadal lahu-lahu the ki lashkar gulab ke

saya kisi ka sehn-e-chaman par bikhar gaya

aur ban rahe hain bagh mein paikar gulab ke

koi to rang-e-atish-e-lab ko badal gaya

pahle the un ke honT barabar gulab ke

yaqut tha sharar the lahu tha ki aab-e-surKH

aankhen thin un ki ya ki the saghar gulab ke

bhanwaron se puchhe koi bhala ras ko chhoD kar

kya DhunDte hain jaane wo andar gulab ke

bulbul se koi kah de chaman mein ki in dinon

'amrit' bhi ho gae hain suKHanwar gulab ke