milti hai mujhko lazzat us yaad ki chubhan se

miltī hai mujh ko lazzat us yaad kī chubhan se

ġhurbat meñ aa.e jaise apnā koī vatan se

guzrā hai shoḳh koī lahrā ke sehn-e-dil se

ik bhīnī bhīnī ḳhushbū jaatī nahīñ badan se

duniyā kī Thokaroñ meñ rakkhā gayā hai jis ko

aatī hai us kī ḳhushbū phūloñ ke pairahan se

kyārī meñ ḳhuun Daalā paudā lagāyā jis ne

vo hī nikal gayā hai kāshāna-e-chaman se

jab ham ne baat chheḌī mahfil huī charāġhāñ

har shai ne daad māñgī zaḳhmoñ kī anjuman se

mahfil meñ aa ga.e haiñ aur suraḳh-rū bhī hoñge

e.azāz bhī milegā 'bāno' ko husn-e-zan se

milti hai mujh ko lazzat us yaad ki chubhan se

ghurbat mein aae jaise apna koi watan se

guzra hai shoKH koi lahra ke sehn-e-dil se

ek bhini bhini KHushbu jati nahin badan se

duniya ki Thokaron mein rakkha gaya hai jis ko

aati hai us ki KHushbu phulon ke pairahan se

kyari mein KHun Dala pauda lagaya jis ne

wo hi nikal gaya hai kashana-e-chaman se

jab hum ne baat chheDi mahfil hui charaghan

har shai ne dad mangi zaKHmon ki anjuman se

mahfil mein aa gae hain aur suraKH-ru bhi honge

eazaz bhi milega 'bano' ko husn-e-zan se