milti hai use gauhar-e-shab-tab ki miras

miltī hai use gauhar-e-shab-tāb kī mīrās

lī mujh dil-e-sad-pāra ne sīmāb kī mīrās

hasrat se tirī chashm kī nargis ne chaman meñ

paa.ī hai kisī dīda-e-be-ḳhvāb kī mīrās

yaañ jo dil-e-raushan ki vo ḳhālī hai ḳhudī se

pahuñchā.ī falak ne use mahtāb kī mīrās

ik bīḌā-e-pāñ haath se tū apne jo baḳhshe

tuutī ko mile ġhaib se surḳhāb kī mīrās

pasañg haiñ la.al us ke bhī jis sañg ko pahuñche

ik qatra mire ashk ke ḳhūñbāb kī mīrās

ro-ro ke mirī chashm ne is bahr-e-jahāñ se

lī ḳhāna-ḳharābī ke liye aab kī mīrās

ye dard-o-ġham-e-ishq dilā jaan ġhanīmat

pahuñchī tirī hub se tujhe ahbāb kī mīrās

dariyā-e-mohabbat se 'muhib' le hī ke chhoḌī

mujh ashk ne āḳhir dur-e-nāyāb kī mīrās

milti hai use gauhar-e-shab-tab ki miras

li mujh dil-e-sad-para ne simab ki miras

hasrat se teri chashm ki nargis ne chaman mein

pai hai kisi dida-e-be-KHwab ki miras

yan jo dil-e-raushan ki wo KHali hai KHudi se

pahunchai falak ne use mahtab ki miras

ek biDa-e-pan hath se tu apne jo baKHshe

tuti ko mile ghaib se surKHab ki miras

pasang hain lal us ke bhi jis sang ko pahunche

ek qatra mere ashk ke KHunbab ki miras

ro-ro ke meri chashm ne is bahr-e-jahan se

li KHana-KHarabi ke liye aab ki miras

ye dard-o-gham-e-ishq dila jaan ghanimat

pahunchi teri hub se tujhe ahbab ki miras

dariya-e-mohabbat se 'muhib' le hi ke chhoDi

mujh ashk ne aaKHir dur-e-nayab ki miras