uske kuche se jo uTh ahl-e-wafa jate hain

us ke kūche se jo uTh ahl-e-vafā jaate haiñ

tā-nazar kaam kare rū-ba-qafā jaate haiñ

muttasil rote hī rahiye to bujhe ātish-e-dil

ek do aañsū to aur aag lagā jaate haiñ

vaqt-e-ḳhush un kā jo ham-bazm haiñ tere ham to

dar-o-dīvār ko ahvāl sunā jaate haiñ

jā.egī tāqat-e-pā aah tū kariyegā kyā

ab to ham haal kabhū tum ko dikhā jaate haiñ

ek bīmār-e-judā.ī huuñ maiñ aaphī tis par

pūchhne vaale judā jaan ko khā jaate haiñ

ġhair kī teġh-e-zabāñ se tirī majlis meñ to ham

aa ke roz ek nayā zaḳhm uThā jaate haiñ

arz-e-vahshat na diyā kar to bagūle itnī

apnī vaadī pe kabhū yaar bhī aa jaate haiñ

'mīr' sāhab bhī tire kūche meñ shab aate haiñ lek

jaise daryūza-garī karne gadā jaate haiñ

us ke kuche se jo uTh ahl-e-wafa jate hain

ta-nazar kaam kare ru-ba-qafa jate hain

muttasil rote hi rahiye to bujhe aatish-e-dil

ek do aansu to aur aag laga jate hain

waqt-e-KHush un ka jo ham-bazm hain tere hum to

dar-o-diwar ko ahwal suna jate hain

jaegi taqat-e-pa aah tu kariyega kya

ab to hum haal kabhu tum ko dikha jate hain

ek bimar-e-judai hun main aaphi tis par

puchhne wale juda jaan ko kha jate hain

ghair ki tegh-e-zaban se teri majlis mein to hum

aa ke roz ek naya zaKHm uTha jate hain

arz-e-wahshat na diya kar to bagule itni

apni wadi pe kabhu yar bhi aa jate hain

'mir' sahab bhi tere kuche mein shab aate hain lek

jaise daryuza-gari karne gada jate hain