mustujib-e-zulm-o-sitam-o-jaur-o-jafa hun

mustujib-e-zulm-o-sitam-o-jaur-o-jafā huuñ

har-chand ki jaltā huuñ pe sargarm-e-vafā huuñ

aate haiñ mujhe ḳhuub se donoñ hunar-e-ishq

rone ke ta.iiñ āñdhī huuñ kuḌhne ko balā huuñ

is gulshan-e-duniyā meñ shagufta na huā maiñ

huuñ ġhuncha-e-afsurda ki mardūd-e-sabā huuñ

ham-chashm hai har ābla-e-pā kā mirā ashk

az-bas ki tirī raah meñ āñkhoñ se chalā huuñ

aayā koī bhī tarah mire chiin kī hogī

āzurda huuñ jiine se maiñ marne se ḳhafā huuñ

dāman na jhaTak haath se mere ki sitamgar

huuñ ḳhāk-e-sar-e-rāh koī dam meñ huā huuñ

dil ḳhvāh jalā ab to mujhe ai shab-e-hijrāñ

maiñ soḳhta bhī muntazir-e-roz-e-jazā huuñ

go tāqat-o-ārām-o-ḳhor-o-ḳhvāb ga.e sab

baare ye ġhanīmat hai ki jiitā to rahā huuñ

itnā hī mujhe ilm hai kuchh maiñ huuñ bahar-chīz

ma.alūm nahīñ ḳhuub mujhe bhī ki maiñ kyā huuñ

behtar hai ġharaz ḳhāmushī hī kahne se yārāñ

mat pūchho kuchh ahvāl ki mar mar ke jiyā huuñ

tab garm-e-suḳhan kahne lagā huuñ maiñ ki ik umr

juuñ sham.a sar-e-shām se tā-sub.h jalā huuñ

siina to kiyā fazl-e-ilāhī se sabhī chaak

hai vaqt-e-duā 'mīr' ki ab dil ko lagā huuñ

mustujib-e-zulm-o-sitam-o-jaur-o-jafa hun

har-chand ki jalta hun pe sargarm-e-wafa hun

aate hain mujhe KHub se donon hunar-e-ishq

rone ke tain aandhi hun kuDhne ko bala hun

is gulshan-e-duniya mein shagufta na hua main

hun ghuncha-e-afsurda ki mardud-e-saba hun

ham-chashm hai har aabla-e-pa ka mera ashk

az-bas ki teri rah mein aankhon se chala hun

aaya koi bhi tarah mere chin ki hogi

aazurda hun jine se main marne se KHafa hun

daman na jhaTak hath se mere ki sitamgar

hun KHak-e-sar-e-rah koi dam mein hua hun

dil KHwah jala ab to mujhe ai shab-e-hijran

main soKHta bhi muntazir-e-roz-e-jaza hun

go taqat-o-aram-o-KHor-o-KHwab gae sab

bare ye ghanimat hai ki jita to raha hun

itna hi mujhe ilm hai kuchh main hun bahar-chiz

malum nahin KHub mujhe bhi ki main kya hun

behtar hai gharaz KHamushi hi kahne se yaran

mat puchho kuchh ahwal ki mar mar ke jiya hun

tab garm-e-suKHan kahne laga hun main ki ek umr

jun shama sar-e-sham se ta-subh jala hun

sina to kiya fazl-e-ilahi se sabhi chaak

hai waqt-e-dua 'mir' ki ab dil ko laga hun