jins-e-giran ko tujhse jo log chahte hain

jins-e-girāñ ko tujh se jo log chāhte haiñ

ve rog apne jī ko nāhaq basāhate haiñ

us mai-kade meñ ham bhī muddat se haiñ va-lekin

ḳhamyāza khīñchte haiñ har dam jamāhate haiñ

nāmūs dostī se gardan bañdhī hai apnī

jiite haiñ jab talak ham tab tak nibāhte haiñ

sahl is qadar nahīñ hai mushkil-pasandī merī

jo tujh ko dekhte haiñ mujh ko sarāhte haiñ

ve din ga.e ki rāteñ nāloñ se kāTte the

be-Dol 'mīr'-sāhib ab kuchh karāhte haiñ

jins-e-giran ko tujh se jo log chahte hain

we rog apne ji ko nahaq basahate hain

us mai-kade mein hum bhi muddat se hain wa-lekin

KHamyaza khinchte hain har dam jamahate hain

namus dosti se gardan bandhi hai apni

jite hain jab talak hum tab tak nibahte hain

sahl is qadar nahin hai mushkil-pasandi meri

jo tujh ko dekhte hain mujh ko sarahte hain

we din gae ki raaten nalon se kaTte the

be-Dol 'mir'-sahib ab kuchh karahte hain