dard-o-andoh mein Thahra jo raha main hi hun

dard-o-andoh meñ Thahrā jo rahā maiñ hī huuñ

rañg-rū jis ke kabhū muñh na chaḌhā maiñ hī huuñ

jis pe karte ho sadā jaur-o-jafā maiñ hī huuñ

phir bhī jis ko hai gumāñ tum se vafā meñ hī huuñ

bad kahā maiñ ne raqīboñ ko to taqsīr huī

kyuuñ hai baḳhsho bhī bhalā sab meñ burā maiñ hī huuñ

apne kūche meñ fuġhāñ jis kī suno ho har raat

vo jigar-e-soḳhta o sīna-jalā maiñ hī huuñ

ḳhaar ko jin ne laḌī motī kī kar dikhlāyā

us bayābān meñ vo ābla-pā maiñ hī huuñ

lutf aane kā hai kyā bas nahīñ ab tāb-e-jafā

itnā aalam hai bharā jaao na kyā maiñ hī huuñ

ruk ke jī ek jahāñ dūsre aalam ko gayā

tan-e-tanhā na tire ġham meñ huā maiñ hī huuñ

is adā ko to Tak ik sair kar insāf karo

vo burā haigā bhalā dosto yā maiñ hī huuñ

maiñ ye kahtā thā ki dil jan ne liyā kaun hai vo

yak-ba-yak bol uThā us taraf aa maiñ hī huuñ

jab kahā maiñ ne ki tū hī hai to phir kahne lagā

kyā karegā tū mirā dekhūñ to jā maiñ hī huuñ

sunte hī hans ke Tak ik sochiyo kyā tū hī thā

jin ne shab ro ke sab ahvāl kahā maiñ hī huuñ

'mīr' āvāra-e-ālam jo sunā hai tū ne

ḳhāk-ālūda vo ai bād-e-sabā maiñ hī huuñ

kāsa-e-sar ko liye māñgtā dīdār phire

'mīr' vo jaan se bezār gadā maiñ hī huuñ

dard-o-andoh mein Thahra jo raha main hi hun

rang-ru jis ke kabhu munh na chaDha main hi hun

jis pe karte ho sada jaur-o-jafa main hi hun

phir bhi jis ko hai guman tum se wafa mein hi hun

bad kaha main ne raqibon ko to taqsir hui

kyun hai baKHsho bhi bhala sab mein bura main hi hun

apne kuche mein fughan jis ki suno ho har raat

wo jigar-e-soKHta o sina-jala main hi hun

KHar ko jin ne laDi moti ki kar dikhlaya

us bayaban mein wo aabla-pa main hi hun

lutf aane ka hai kya bas nahin ab tab-e-jafa

itna aalam hai bhara jao na kya main hi hun

ruk ke ji ek jahan dusre aalam ko gaya

tan-e-tanha na tere gham mein hua main hi hun

is ada ko to Tak ek sair kar insaf karo

wo bura haiga bhala dosto ya main hi hun

main ye kahta tha ki dil jan ne liya kaun hai wo

yak-ba-yak bol uTha us taraf aa main hi hun

jab kaha main ne ki tu hi hai to phir kahne laga

kya karega tu mera dekhun to ja main hi hun

sunte hi hans ke Tak ek sochiyo kya tu hi tha

jin ne shab ro ke sab ahwal kaha main hi hun

'mir' aawara-e-alam jo suna hai tu ne

KHak-aluda wo ai baad-e-saba main hi hun

kasa-e-sar ko liye mangta didar phire

'mir' wo jaan se bezar gada main hi hun