nikle hai jins-e-husn kisi karwan mein

nikle hai jins-e-husn kisī kārvāñ meñ

ye vo nahīñ matā.a ki ho har dukān meñ

jaatā hai ik hujūm-e-ġham ishq-jī ke saath

hañgāma le chale haiñ ham us bhī jahān meñ

yārab koī to vāsta sar-gashtagī kā hai

yak ishq bhar rahā hai tamām āsmān meñ

ham us se aah soz-e-dil apnā na kah sake

the ātish-e-darūñ se phaphole zabān meñ

ġham khīñchne ko kuchh to tavānā.ī chāhiye

sivayyāñ na dil meñ taab na tāqat hai jaan meñ

ġhāfil na rahiyo ham se ki ham ve nahīñ rahe

hotā hai ab to haal ajab ek aan meñ

ve din ga.e ki ātish-e-ġham dil meñ thī nihāñ

sozish rahe hai ab to har ik ustuḳhvān meñ

dil nazr-o-dīda-pesh-kash ai bā.is-e-hayāt

sach kah ki jī lage hai tirā kis makān meñ

khīñchā na kar tū teġh ki ik din nahīñ haiñ ham

zālim qabāhateñ haiñ bahut imtihān meñ

phāḌā hazār jā se garebān-e-sabr-e-'mīr'

kyā kah ga.ī nasīm-e-sahar gul ke kaan meñ

nikle hai jins-e-husn kisi karwan mein

ye wo nahin mataa ki ho har dukan mein

jata hai ek hujum-e-gham ishq-ji ke sath

hangama le chale hain hum us bhi jahan mein

yarab koi to wasta sar-gashtagi ka hai

yak ishq bhar raha hai tamam aasman mein

hum us se aah soz-e-dil apna na kah sake

the aatish-e-darun se phaphole zaban mein

gham khinchne ko kuchh to tawanai chahiye

siwayyan na dil mein tab na taqat hai jaan mein

ghafil na rahiyo hum se ki hum we nahin rahe

hota hai ab to haal ajab ek aan mein

we din gae ki aatish-e-gham dil mein thi nihan

sozish rahe hai ab to har ek ustuKHwan mein

dil nazr-o-dida-pesh-kash ai bais-e-hayat

sach kah ki ji lage hai tera kis makan mein

khincha na kar tu tegh ki ek din nahin hain hum

zalim qabahaten hain bahut imtihan mein

phaDa hazar ja se gareban-e-sabr-e-'mir'

kya kah gai nasim-e-sahar gul ke kan mein