ek parwaz ko bhi ruKHsat-e-sayyaad nahin

ek parvāz ko bhī ruḳhsat-e-sayyād nahīñ

varna ye kunj-e-qafas baiza-e-faulād nahīñ

shaiḳh-e-uzlat to tah-e-ḳhāk bhī pahuñchegī baham

muft hai sair ki ye ālam-e-ījād nahīñ

daad le chhoḌūñ maiñ sayyād se apnī lekin

zo.af se mere ta.iiñ tāqat-e-faryād nahīñ

kyuuñ hī ma.azūr bhī rakh yuuñ to samajh dil meñ shaiḳh

ye qadah-ḳhvār mire qābil-e-irshād nahīñ

be-sutūñ bhī hai vahī aur vahī jū-e-shīr

thā namak shohrat-e-shīrīñ kā so farhād nahīñ

kyā kahūñ 'mīr' farāmosh kiyā un ne tujhe

maiñ to taqrīb bhī kī par tū use yaad nahīñ

ek parwaz ko bhi ruKHsat-e-sayyaad nahin

warna ye kunj-e-qafas baiza-e-faulad nahin

shaiKH-e-uzlat to tah-e-KHak bhi pahunchegi baham

muft hai sair ki ye aalam-e-ijad nahin

dad le chhoDun main sayyaad se apni lekin

zoaf se mere tain taqat-e-faryaad nahin

kyun hi mazur bhi rakh yun to samajh dil mein shaiKH

ye qadah-KHwar mere qabil-e-irshad nahin

be-sutun bhi hai wahi aur wahi ju-e-shir

tha namak shohrat-e-shirin ka so farhad nahin

kya kahun 'mir' faramosh kiya un ne tujhe

main to taqrib bhi ki par tu use yaad nahin