garche kab dekhte ho par dekho

garche kab dekhte ho par dekho

aarzū hai ki tum idhar dekho

ishq kyā kyā hameñ dikhātā hai

aah tum bhī to ik nazar dekho

yuuñ araq jalva-gar hai us muñh par

jis tarah os phuul par dekho

har ḳharāsh-e-jabīñ jarāhat hai

nāḳhun-e-shauq kā hunar dekho

thī hameñ aarzū lab-e-ḳhandāñ

so evaz us ke chashm-e-tar dekho

rañg-rafta bhī dil ko khīñche hai

ek shab aur yaañ sahar dekho

dil huā hai taraf mohabbat kā

ḳhuun ke qatre kā jigar dekho

pahuñche haiñ ham qarīb marne ke

ya.anī jaate haiñ duur agar dekho

lutf mujh meñ bhī haiñ hazāroñ 'mīr'

dīdanī huuñ jo soch kar dekho

garche kab dekhte ho par dekho

aarzu hai ki tum idhar dekho

ishq kya kya hamein dikhata hai

aah tum bhi to ek nazar dekho

yun araq jalwa-gar hai us munh par

jis tarah os phul par dekho

har KHarash-e-jabin jarahat hai

naKHun-e-shauq ka hunar dekho

thi hamein aarzu lab-e-KHandan

so ewaz us ke chashm-e-tar dekho

rang-rafta bhi dil ko khinche hai

ek shab aur yan sahar dekho

dil hua hai taraf mohabbat ka

KHun ke qatre ka jigar dekho

pahunche hain hum qarib marne ke

yani jate hain dur agar dekho

lutf mujh mein bhi hain hazaron 'mir'

didani hun jo soch kar dekho