waisa kahan hai humse jaisa ki aage tha tu

vaisā kahāñ hai ham se jaisā ki aage thā tū

auroñ se mil ke pyāre kuchh aur ho gayā tū

chāleñ tamām be-Dhab bāteñ fareb haiñ sab

hāsil ki ai shukr lab ab vo nahīñ rahā tū

jaate nahīñ uThā.e ye shor har sahar ke

yā ab chaman meñ bulbul ham hī raheñge yā tū

aa abr ek do dam aapas meñ rakheñ sohbat

kuḌhne ko huuñ maiñ āñdhī rone ko hai balā tū

taqrīb par bhī to tū pahlū tahī kare hai

das baar iid aa.ī kab kab gale milā tū

tere dahan se us ko nisbat ho kuchh to kahiye

gul go kare hai da.avā ḳhātir meñ kuchh na lā tū

dil kyūñke raast aave da.avā-e-āshnā.ī

dariyā-e-husn vo mah-e-kashtī-ba-kaf gadā tū

har fard yaas abhī se daftar hai tujh gale kā

hai qahr jab ki hogā harfoñ se āshnā tū

aalam hai shauq-e-kushta-e-ḳhilqat hai terī rafta

jānoñ kī aarzū tū āñkhoñ kā mudda.ā tū

muñh kariye jis taraf ko so hī tirī taraf hai

par kuchh nahīñ hai paidā kīdhar hai a ḳhudā tū

aatī ba-ḳhud nahīñ hai bād-e-bahār ab tak

do gaam thā chaman meñ Tak naaz se chalā tū

kam merī aur aanā kam aañkh kā milānā

karne se ye adā.eñ hai mudda.ā ki jā tū

guft-o-shunūd aksar mere tire rahe hai

zālim muaaf rakhiyo merā kahā-sunā to

kah sāñjh ke muue ko ai 'mīr' roiiñ kab tak

jaise charāġh-e-muflis ik-dam meñ jal bujhā to

waisa kahan hai hum se jaisa ki aage tha tu

auron se mil ke pyare kuchh aur ho gaya tu

chaalen tamam be-Dhab baaten fareb hain sab

hasil ki ai shukr lab ab wo nahin raha tu

jate nahin uThae ye shor har sahar ke

ya ab chaman mein bulbul hum hi rahenge ya tu

aa abr ek do dam aapas mein rakhen sohbat

kuDhne ko hun main aandhi rone ko hai bala tu

taqrib par bhi to tu pahlu tahi kare hai

das bar id aai kab kab gale mila tu

tere dahan se us ko nisbat ho kuchh to kahiye

gul go kare hai dawa KHatir mein kuchh na la tu

dil kyunke rast aawe dawa-e-ashnai

dariya-e-husn wo mah-e-kashti-ba-kaf gada tu

har fard yas abhi se daftar hai tujh gale ka

hai qahr jab ki hoga harfon se aashna tu

aalam hai shauq-e-kushta-e-KHilqat hai teri rafta

jaanon ki aarzu tu aankhon ka muddaa tu

munh kariye jis taraf ko so hi teri taraf hai

par kuchh nahin hai paida kidhar hai a KHuda tu

aati ba-KHud nahin hai baad-e-bahaar ab tak

do gam tha chaman mein Tak naz se chala tu

kam meri aur aana kam aankh ka milana

karne se ye adaen hai muddaa ki ja tu

guft-o-shunud aksar mere tere rahe hai

zalim muaf rakhiyo mera kaha-suna to

kah sanjh ke mue ko ai 'mir' roin kab tak

jaise charagh-e-muflis ik-dam mein jal bujha to