dil saf ho to jalwa-gah-e-yar kyun na ho

dil saaf ho to jalva-gah-e-yār kyuuñ na ho

ā.īna ho to qābil-e-dīdār kyuuñ na ho

'ālam tamām us kā giraftār kyuuñ na ho

vo nāz-pesha ek hai 'ayyār kyuuñ na ho

mustaġhyāna to jo kare pahle hī sulūk

'āshiq ko fikr-e-āqibat-kār kyuuñ na ho

rahmat ġhazab meñ nisbat-e-barq-o-sahāb hai

jis ko shu'ūr ho to gunahgār kyuuñ na ho

dushman to ik taraf ki sabab rashk kā hai yaañ

dar kā shiġhāf-o-raḳhna-e-dīvār kyuuñ na ho

āyāt-e-haq haiñ saare ye zarrāt-e-kā.enāt

inkār tujh ko hove so iqrār kyuuñ na ho

har-dam kī taaza marg-e-judā.ī se tañg huuñ

honā jo kuchh hai aah so yak-bār kyuuñ na ho

mū-e-safed ham ko kahe hai ki ġhāfilāñ

ab sub.h hone aa.ī hai bedār kyuuñ na ho

nazdīk apne ham ne to sab kar rakhā hai sahl

phir 'mīr' is meñ murdan-e-dushvār kyuuñ na ho

dil saf ho to jalwa-gah-e-yar kyun na ho

aaina ho to qabil-e-didar kyun na ho

'alam tamam us ka giraftar kyun na ho

wo naz-pesha ek hai 'ayyar kyun na ho

mustaghyana to jo kare pahle hi suluk

'ashiq ko fikr-e-aqibat-kar kyun na ho

rahmat ghazab mein nisbat-e-barq-o-sahab hai

jis ko shu'ur ho to gunahgar kyun na ho

dushman to ek taraf ki sabab rashk ka hai yan

dar ka shighaf-o-raKHna-e-diwar kyun na ho

aayat-e-haq hain sare ye zarraat-e-kaenat

inkar tujh ko howe so iqrar kyun na ho

har-dam ki taza marg-e-judai se tang hun

hona jo kuchh hai aah so yak-bar kyun na ho

mu-e-safed hum ko kahe hai ki ghafilan

ab subh hone aai hai bedar kyun na ho

nazdik apne hum ne to sab kar rakha hai sahl

phir 'mir' is mein murdan-e-dushwar kyun na ho