suna hai haal tere kushtagan bechaaron ka

sunā hai haal tire kushtagāñ bechāroñ kā

huā na gor gaḌhā un sitam ke māroñ kā

hazār rang khile gul chaman ke haiñ shāhid

ki rozgār ke sar ḳhuun hai hazāroñ kā

milā hai ḳhaak meñ kis kis tarah kā 'ālam yaañ

nikal ke shahr se Tak sair kar mazāroñ kā

'araq-fishānī se us zulf kī hirāsāñ huuñ

bhalā nahīñ hai bahut TūTnā bhī tāroñ kā

'ilāj karte haiñ saudā-e-ishq kā mere

ḳhalal-pazīr huā hai dimāġh yāroñ kā

tirī hī zulf ko mahshar meñ ham dikhā deñge

jo koī māñgegā naama siyāhkāroñ kā

ḳharāsh-e-sīna-e-āshiq bhī dil ko lag jaa.e

'ajab tarah kā hai firqa ye dil-figāroñ kā

nigāh-e-mast ke maare tirī ḳharāb haiñ shoḳh

na Thor hai na Thikānā hai hoshiyāroñ kā

kareñ haiñ dā'vā ḳhush-chashmī-e-āhūvān-e-dast

Tak ek dekhne chal malak un gañvāroñ kā

taḌap ke marne se dil ke ki maġhfirat ho use

jahāñ meñ kuchh to rahā naam be-qarāroñ kā

taḌap ke ḳhirman-e-gul par kabhī gir ai bijlī

jalānā kyā hai mire āshiyāñ ke ḳhāroñ kā

tumheñ to zohd-o-vara.a par bahut hai apne ġhurūr

ḳhudā hai shaiḳh-jī ham bhī gunāhgāroñ kā

uThe hai gard kī jā naala gor se is kī

ġhubār-e-'mīr' bhī 'āshiq hai ne savāroñ kā

suna hai haal tere kushtagan bechaaron ka

hua na gor gaDha un sitam ke maron ka

hazar rang khile gul chaman ke hain shahid

ki rozgar ke sar KHun hai hazaron ka

mila hai KHak mein kis kis tarah ka 'alam yan

nikal ke shahr se Tak sair kar mazaron ka

'araq-fishani se us zulf ki hirasan hun

bhala nahin hai bahut TuTna bhi taron ka

'ilaj karte hain sauda-e-ishq ka mere

KHalal-pazir hua hai dimagh yaron ka

teri hi zulf ko mahshar mein hum dikha denge

jo koi mangega nama siyahkaron ka

KHarash-e-sina-e-ashiq bhi dil ko lag jae

'ajab tarah ka hai firqa ye dil-figaron ka

nigah-e-mast ke mare teri KHarab hain shoKH

na Thor hai na Thikana hai hoshiyaron ka

karen hain da'wa KHush-chashmi-e-ahuwan-e-dast

Tak ek dekhne chal malak un ganwaron ka

taDap ke marne se dil ke ki maghfirat ho use

jahan mein kuchh to raha nam be-qararon ka

taDap ke KHirman-e-gul par kabhi gir ai bijli

jalana kya hai mere aashiyan ke KHaron ka

tumhein to zohd-o-wara par bahut hai apne ghurur

KHuda hai shaiKH-ji hum bhi gunahgaron ka

uThe hai gard ki ja nala gor se is ki

ghubar-e-'mir' bhi 'ashiq hai ne sawaron ka