ab haal apna uske hai dil-KHwah

ab haal apnā us ke hai dil-ḳhvāh

kyā pūchhte ho alhamdulillāh

mar jaao koī parvā nahīñ hai

kitnā hai maġhrūr allāh allāh

pīr-e-muġhāñ se be-etiqādī

astaġhfirullah astaġhfirullāh

kahte haiñ us ke tū muñh lagegā

ho yuuñ hī yārab juuñ hai ye afvāh

hazrat se us kī jaanā kahāñ hai

ab mar rahegā yaañ banda dargāh

sab aql kho.e hai rāh-e-mohabbat

ho ḳhizr dil meñ kaisā hī gumrāh

mujrim hue ham dil de ke varna

kis ko kaso se hotī nahīñ chaah

kyā kyā na rījheñ tum ne pachā.īñ

achchhā rijhāyā ai mehrbāñ aah

guzre hai dekheñ kyūñkar hamārī

us bevafā se ne rasm ne raah

thī ḳhvāhish-e-dil rakhnā hamā.il

gardan meñ us kī har gāh-o-be-gāh

us par ki thā vo shah-e-rag se aqrab

hargiz na pahuñchā ye dast-e-kotāh

hai mā-sivā kyā jo 'mīr' kahiye

āgāh saare us se haiñ āgāh

jalve haiñ us ke shāneñ haiñ us kī

kyā roz kyā ḳhor kyā raat kyā maah

zāhir ki bātin avval ki āḳhir

allāh allāh allāh allāh

ab haal apna us ke hai dil-KHwah

kya puchhte ho alhamdulillah

mar jao koi parwa nahin hai

kitna hai maghrur allah allah

pir-e-mughan se be-etiqadi

astaghfirullah astaghfirullah

kahte hain us ke tu munh lagega

ho yun hi yarab jun hai ye afwah

hazrat se us ki jaana kahan hai

ab mar rahega yan banda dargah

sab aql khoe hai rah-e-mohabbat

ho KHizr dil mein kaisa hi gumrah

mujrim hue hum dil de ke warna

kis ko kaso se hoti nahin chah

kya kya na rijhen tum ne pachain

achchha rijhaya ai mehrban aah

guzre hai dekhen kyunkar hamari

us bewafa se ne rasm ne rah

thi KHwahish-e-dil rakhna hamail

gardan mein us ki har gah-o-be-gah

us par ki tha wo shah-e-rag se aqrab

hargiz na pahuncha ye dast-e-kotah

hai ma-siwa kya jo 'mir' kahiye

aagah sare us se hain aagah

jalwe hain us ke shanen hain us ki

kya roz kya KHor kya raat kya mah

zahir ki baatin awwal ki aaKHir

allah allah allah allah