juz jurm-e-ishq koi bhi sabit kiya gunah

juz jurm-e-ishq koī bhī sābit kiyā gunāh

nāhaq hamārī jaan lī achchhe ho vaah vaah

ab kaisā chaak chaak ho dil us ke hijr meñ

guththavāñ to laḳht-e-dil se nikaltī hai merī aah

shaam shab-e-visāl huī yaañ ki is taraf

hone lagā tulūa hī ḳhurshīd rū-siyāh

guzrā maiñ us sulūk se dekhā na kar mujhe

barchhī sī laag jā hai jigar meñ tirī nigāh

dāmān-o-jeb chaak ḳharābī-o-ḳhastagī

un se tire firāq meñ ham ne kiyā nibāh

betābiyoñ ko sauñp na denā kahīñ mujhe

ai sabr maiñ ne aan ke lī hai tirī panāh

ḳhūñ-basta baare rahne lagī ab to ye mizha

aañsū kī buuñd jis se Tapaktī thī gaah gaah

gul se shagufta daaġh dikhātā huuñ tere tiiñ

gar muvāfaqat kare hai tanik mujh se sāl-o-māh

gar manā mujh ko karte haiñ terī galī se log

kyūñkar na jā.ūñ mujh ko to marnā hai ḳhvā-maḳhvāh

nāhaq ulajh paḌā hai ye mujh se tarīq-e-ishq

jaatā thā 'mīr' meñ to chalā apnī raah raah

juz jurm-e-ishq koi bhi sabit kiya gunah

nahaq hamari jaan li achchhe ho wah wah

ab kaisa chaak chaak ho dil us ke hijr mein

guththawan to laKHt-e-dil se nikalti hai meri aah

sham shab-e-visal hui yan ki is taraf

hone laga tulua hi KHurshid ru-siyah

guzra main us suluk se dekha na kar mujhe

barchhi si lag ja hai jigar mein teri nigah

daman-o-jeb chaak KHarabi-o-KHastagi

un se tere firaq mein hum ne kiya nibah

betabiyon ko saunp na dena kahin mujhe

ai sabr main ne aan ke li hai teri panah

KHun-basta bare rahne lagi ab to ye mizha

aansu ki bund jis se Tapakti thi gah gah

gul se shagufta dagh dikhata hun tere tin

gar muwafaqat kare hai tanik mujh se sal-o-mah

gar mana mujh ko karte hain teri gali se log

kyunkar na jaun mujh ko to marna hai KHwa-maKHwah

nahaq ulajh paDa hai ye mujh se tariq-e-ishq

jata tha 'mir' mein to chala apni rah rah