kis husn se kahun main uski KHush-aKHtari ki

kis husn se kahūñ maiñ us kī ḳhush-aḳhtarī kī

is māh-rū ke aage kyā taab mushtarī kī

rakhnā na thā qadam yaañ juuñ baad be-tāmmul

sair is jahāñ kī rahrav par tū ne sarsarī kī

shub.h bahāl sag meñ ik 'umr sarf kī hai

mat pūchh in ne mujh se jo ādmī-garī kī

paa.e gul us chaman meñ chhoḌā gayā na ham se

sar par hamāre ab ke mannat hai be-parī kī

pesha to ek hī thā us kā hamārā lekin

majnūñ ke tāle.oñ ne shohrat meñ yāvarī kī

girye se dāġh-e-sīna taaza hue haiñ saare

ye kisht-e-ḳhushk tū ne ai chashm phir harī kī

ye daur to muāfiq hotā nahīñ magar ab

rakhiye binā-e-tāza is charḳh-e-chambarī kī

ḳhūbāñ tumhārī ḳhūbī tā-chand naql kariye

ham ranja-ḳhātiroñ kī kyā ḳhuub dilbarī kī

ham se jo 'mīr' uḌ kar aflāk-e-charḳh meñ haiñ

un ḳhaak meñ malūñ kī kaahe ko hamsarī kī

kis husn se kahun main us ki KHush-aKHtari ki

is mah-ru ke aage kya tab mushtari ki

rakhna na tha qadam yan jun baad be-tammul

sair is jahan ki rahraw par tu ne sarsari ki

shubh bahaal sag mein ek 'umr sarf ki hai

mat puchh in ne mujh se jo aadmi-gari ki

pae gul us chaman mein chhoDa gaya na hum se

sar par hamare ab ke mannat hai be-pari ki

pesha to ek hi tha us ka hamara lekin

majnun ke taleon ne shohrat mein yawari ki

girye se dagh-e-sina taza hue hain sare

ye kisht-e-KHushk tu ne ai chashm phir hari ki

ye daur to muafiq hota nahin magar ab

rakhiye bina-e-taza is charKH-e-chambari ki

KHuban tumhaari KHubi ta-chand naql kariye

hum ranja-KHatiron ki kya KHub dilbari ki

hum se jo 'mir' uD kar aflak-e-charKH mein hain

un KHak mein malun ki kahe ko hamsari ki