dil ke mamure ki mat kar fikr fursat chahiye

dil ke māmūre kī mat kar fikr fursat chāhiye

aise vīrāne ke ab basne ko muddat chāhiye

ishq-o-mai-ḳhvārī nibhe hai koī darveshī ke biich

is tarah ke ḳharj-e-lā-hāsil ko daulat chāhiye

'āqibat farhād mar kar kaam apnā kar gayā

aadmī hove kisī peshe meñ jur.at chāhiye

ho taraf mujh pahlvāñ shā'ir kā kab 'ājiz suḳhan

sāmne hone ko sāhab fan ke qudrat chāhiye

'ishq meñ vasl-o-judā.ī se nahīñ kuchh guftugū

qurb-o-buad us jā barābar hai mohabbat chāhiye

nāzukī ko 'ishq meñ kyā daḳhl hai ai bul-havas

yaañ sa'ūbat khīñchne ko jī meñ tāqat chāhiye

tañg mat ho ibtidā-e-āshiqī meñ is qadar

ḳhairiyat hai 'mīr' sāhib dil salāmat chāhiye

dil ke mamure ki mat kar fikr fursat chahiye

aise virane ke ab basne ko muddat chahiye

ishq-o-mai-KHwari nibhe hai koi darweshi ke bich

is tarah ke KHarj-e-la-hasil ko daulat chahiye

'aqibat farhad mar kar kaam apna kar gaya

aadmi howe kisi peshe mein jurat chahiye

ho taraf mujh pahlwan sha'ir ka kab 'ajiz suKHan

samne hone ko sahab fan ke qudrat chahiye

'ishq mein wasl-o-judai se nahin kuchh guftugu

qurb-o-buad us ja barabar hai mohabbat chahiye

nazuki ko 'ishq mein kya daKHl hai ai bul-hawas

yan sa'ubat khinchne ko ji mein taqat chahiye

tang mat ho ibtida-e-ashiqi mein is qadar

KHairiyat hai 'mir' sahib dil salamat chahiye