shash-jihat se isMein zalim bu-e-KHun ki rah hai

shash-jihat se is meñ zālim bū-e-ḳhūñ kī raah hai

terā kūcha ham se tū kah kis kī bismil-gāh hai

ek nibhne kā nahīñ mizhgāñ talak bojhal haiñ sab

kārvāñ laḳht-e-dil-e-har-ashk ke hamrāh hai

ham javānoñ ko na chhoḌā us se sab pakḌe ga.e

ye do-sāla duḳhtar-e-raz kis qadar shattāh hai

pā-barahna ḳhaak sar meñ mū pareshāñ siina chaak

haal merā dekhne aa tere hī dil-ḳhvāh hai

is junūñ par 'mīr' koī bhī phire hai shahr meñ

jāda-e-sahrā se kar sāzish jo tujh se raah hai

shash-jihat se is mein zalim bu-e-KHun ki rah hai

tera kucha hum se tu kah kis ki bismil-gah hai

ek nibhne ka nahin mizhgan talak bojhal hain sab

karwan laKHt-e-dil-e-har-ashk ke hamrah hai

hum jawanon ko na chhoDa us se sab pakDe gae

ye do-sala duKHtar-e-raz kis qadar shattah hai

pa-barahna KHak sar mein mu pareshan sina chaak

haal mera dekhne aa tere hi dil-KHwah hai

is junun par 'mir' koi bhi phire hai shahr mein

jada-e-sahra se kar sazish jo tujh se rah hai