kab talak ye sitam uThaiyega

kab talak ye sitam uThā.iyegā

ek din yūñhī jī se jā.iyegā

shakl tasvīr-e-be-ḳhudī kab tak

kaso din aap meñ bhī ā.iyegā

sab se mil chal ki hādse se phir

kahīñ DhūñDā bhī to na pā.iyegā

na muue ham asīrī meñ to nasīm

koī din aur baav khā.iyegā

kahiyegā us se qissa-e-majnūñ

yā'nī parde meñ ġham sunā.iyegā

us ke pā-bos kī tavaqqo' par

apne tiiñ ḳhaak meñ milā.iyegā

us ke paañv ko jā lagī hai hinā

ḳhuub se haath use lagā.iyegā

shirkat-e-shaiḳh-o-barhman se 'mīr'

ka.aba-o-dair se bhī jā.iyegā

apnī DeḌh iiñT kī jaddī masjid

kisī vīrāne meñ banā.iyegā

kab talak ye sitam uThaiyega

ek din yunhi ji se jaiyega

shakl taswir-e-be-KHudi kab tak

kaso din aap mein bhi aaiyega

sab se mil chal ki hadse se phir

kahin DhunDa bhi to na paiyega

na mue hum asiri mein to nasim

koi din aur baw khaiyega

kahiyega us se qissa-e-majnun

ya'ni parde mein gham sunaiyega

us ke pa-bos ki tawaqqo' par

apne tin KHak mein milaiyega

us ke panw ko ja lagi hai hina

KHub se hath use lagaiyega

shirkat-e-shaiKH-o-barhman se 'mir'

kaba-o-dair se bhi jaiyega

apni DeDh inT ki jaddi masjid

kisi virane mein banaiyega