kya musibat-zada dil mail-e-azar na tha

kyā musībat-zada dil mā.il-e-āzār na thā

kaun se dard-o-sitam kā ye taraf-dār na thā

ādam-e-ḳhākī se aalam ko jilā hai varna

ā.īna thā ye vale qābil-e-dīdār na thā

dhuup meñ jaltī haiñ ġhurbat vatanoñ kī lāsheñ

tere kūche meñ magar sāya-e-dīvār na thā

sad gulistāñ tā-yak baal the us ke jab tak

tā.ir-e-jāñ qafas-e-tan kā giraftār na thā

haif samjhā hī na vo qātil nādāñ varna

be-gunah mārne qābil ye gunahgār na thā

ishq kā jazb huā bā.is-e-saudā varna

yūsuf-e-misr zuleḳhā kā ḳharīdār na thā

narm-tar mom se bhī ham ko koī detī qazā

sañg chhātī kā to ye dil hameñ darkār na thā

raat hairān huuñ kuchh chup hī mujhe lag ga.ī 'mīr'

dard pinhāñ the bahut par lab-e-iz.hār na thā

kya musibat-zada dil mail-e-azar na tha

kaun se dard-o-sitam ka ye taraf-dar na tha

aadam-e-KHaki se aalam ko jila hai warna

aaina tha ye wale qabil-e-didar na tha

dhup mein jalti hain ghurbat watanon ki lashen

tere kuche mein magar saya-e-diwar na tha

sad gulistan ta-yak baal the us ke jab tak

tair-e-jaan qafas-e-tan ka giraftar na tha

haif samjha hi na wo qatil nadan warna

be-gunah marne qabil ye gunahgar na tha

ishq ka jazb hua bais-e-sauda warna

yusuf-e-misr zuleKHa ka KHaridar na tha

narm-tar mom se bhi hum ko koi deti qaza

sang chhati ka to ye dil hamein darkar na tha

raat hairan hun kuchh chup hi mujhe lag gai 'mir'

dard pinhan the bahut par lab-e-izhaar na tha