gila nahin hai hamein apni jaan-gudazi ka

gilā nahīñ hai hameñ apnī jāñ-gudāzī kā

jigar pe zaḳhm hai us kī zabāñ-darāzī kā

samand-e-nāz ne us ke jahāñ kiyā pāmāl

vahī hai ab bhī use shauq tark taazī kā

sitam haiñ qahr haiñ lauñDe sharāb-ḳhāne ke

utaar lete haiñ amāma har namāzī kā

ulaT-palaT mirī āh-e-sahar kī kyā hai kam

agar ḳhayāl tumheñ hove neza-bāzī kā

batāo ham se koī aan tum se kyā bigḌī

nahīñ hai tum ko salīqa zamāna-sāzī kā

ḳhudā ko kaam to sauñpe haiñ maiñ ne sab lekin

rahe hai ḳhauf mujhe vaañ kī be-niyāzī kā

chalo ho rāh-e-muāfiq kahe muḳhālif ke

tarīq chhoḌ diyā tum ne dil-navāzī kā

kaso kī baat ne aage mire na paayā rañg

diloñ meñ naqsh hai merī suḳhan-tarāzī kā

basān-e-ḳhāk ho pāmāl rāh-e-ḳhalq ai 'mīr'

rakhe hai dil meñ agar qasd sarfarāzī kā

gila nahin hai hamein apni jaan-gudazi ka

jigar pe zaKHm hai us ki zaban-daraazi ka

samand-e-naz ne us ke jahan kiya pamal

wahi hai ab bhi use shauq tark tazi ka

sitam hain qahr hain launDe sharab-KHane ke

utar lete hain amama har namazi ka

ulaT-palaT meri aah-e-sahar ki kya hai kam

agar KHayal tumhein howe neza-bazi ka

batao hum se koi aan tum se kya bigDi

nahin hai tum ko saliqa zamana-sazi ka

KHuda ko kaam to saunpe hain main ne sab lekin

rahe hai KHauf mujhe wan ki be-niyazi ka

chalo ho rah-e-muafiq kahe muKHalif ke

tariq chhoD diya tum ne dil-nawazi ka

kaso ki baat ne aage mere na paya rang

dilon mein naqsh hai meri suKHan-taraazi ka

basan-e-KHak ho pamal rah-e-KHalq ai 'mir'

rakhe hai dil mein agar qasd sarfaraazi ka