jo dekho mere sher-e-tar ki taraf

jo dekho mire sher-e-tar kī taraf

to maa.il na ho phir guhar kī taraf

koī dād-e-dil aah kis se kare

har ik hai so us fitna-gar kī taraf

mohabbat ne shāyad ki dī dil ko aag

dhuāñ sā hai kuchh is nagar kī taraf

lagīñ haiñ hazāroñ hī āñkheñ udhar

ik āshob hai us ke ghar kī taraf

bahut rañg miltā hai dekho kabhū

hamārī taraf se sahar kī taraf

ba-ḳhud kis ko us tāb-e-ruḳh ne rakhā

kare kaun shams-o-qamar kī taraf

na samjhā gayā abr kyā dekh kar

huā thā mirī chashm-e-tar kī taraf

Tapaktā hai palkoñ se ḳhuuñ muttasil

nahīñ dekhte ham jigar kī taraf

munāsib nahīñ hāl-e-āshiq se sabr

rakhe hai ye daarū zarar kī taraf

kise manzil-e-dilkash-e-dahr meñ

nahīñ miil ḳhātir safar kī taraf

rag-e-jāñ kab aatī hai āñkhoñ meñ 'mīr'

ga.e haiñ mizāj us kamar kī taraf

jo dekho mere sher-e-tar ki taraf

to mail na ho phir guhar ki taraf

koi dad-e-dil aah kis se kare

har ek hai so us fitna-gar ki taraf

mohabbat ne shayad ki di dil ko aag

dhuan sa hai kuchh is nagar ki taraf

lagin hain hazaron hi aankhen udhar

ek aashob hai us ke ghar ki taraf

bahut rang milta hai dekho kabhu

hamari taraf se sahar ki taraf

ba-KHud kis ko us tab-e-ruKH ne rakha

kare kaun shams-o-qamar ki taraf

na samjha gaya abr kya dekh kar

hua tha meri chashm-e-tar ki taraf

Tapakta hai palkon se KHun muttasil

nahin dekhte hum jigar ki taraf

munasib nahin haal-e-ashiq se sabr

rakhe hai ye daru zarar ki taraf

kise manzil-e-dilkash-e-dahr mein

nahin mil KHatir safar ki taraf

rag-e-jaan kab aati hai aankhon mein 'mir'

gae hain mizaj us kamar ki taraf