mera KHayal hai paband-e-hasrat-o-azar

mirā ḳhayāl hai pāband-e-hasrat-o-āzār

mire gumān meñ bhī tū nahīñ surūr ko paar

mirā tabassum-e-be-kaif ḳhanda-e-bīmār

faroġh-e-ātish-e-dil sho.ala-e-charāġh-e-mazār

shabāb meñ bhī huuñ begāna-e-nashāt-e-shabāb

mirī bahār hai tasvīr-e-gulsitāñ kī bahār

ajiib tarah guzartī hai zindagī merī

na iztirāb kā aalam na rang-e-sabr-o-qarār

zarā sī Thes ġhazab hai vo ranj ho ki ḳhushī

kuchh is qadar hai dil-e-kam-nasīb ḳhasta-o-zār

is ibtidā kī hai kyā intihā kise ma.alūm

abhī to mauj-e-qafas meñ hai rang-e-kāvish-e-ḳhār

kisī se koī shikāyat nahīñ mujhe 'kaukab'

mirī sarisht hai mahzūñ mazāq ḳhud-āzār

mera KHayal hai paband-e-hasrat-o-azar

mere guman mein bhi tu nahin surur ko par

mera tabassum-e-be-kaif KHanda-e-bimar

farogh-e-atish-e-dil shoala-e-charagh-e-mazar

shabab mein bhi hun begana-e-nashat-e-shabab

meri bahaar hai taswir-e-gulsitan ki bahaar

ajib tarah guzarti hai zindagi meri

na iztirab ka aalam na rang-e-sabr-o-qarar

zara si Thes ghazab hai wo ranj ho ki KHushi

kuchh is qadar hai dil-e-kam-nasib KHasta-o-zar

is ibtida ki hai kya intiha kise malum

abhi to mauj-e-qafas mein hai rang-e-kawish-e-KHar

kisi se koi shikayat nahin mujhe 'kaukab'

meri sarisht hai mahzun mazaq KHud-azar