mirā ḳhulūs-e-mohabbat bhī kāmrāñ na huā
vo zulm Dhātā rahā mujh pe mehrbāñ na huā
jabīn-e-ishq jhukī hai na jhuk sakegī kabhī
barā-e-sajda agar terā āstāñ na huā
hai baat kyā jo abhī tak khile na lāla-o-gul
ḳhizāñ ke ba.ad bhī shādāb gulistāñ na huā
tirī hañsī pe luTā dete chāñd tāroñ ko
hamāre zer-e-asar aaj āsmāñ na huā
vo aa.e mere tasavvur meñ shukriya un kā
zahe-nasīb mirā jazb rā.egāñ na huā
kisī ke ishq ne vo hausla diyā mujh ko
koī bhī ġham mire dil par kabhī garāñ na huā
vo āshiyāna ho gulshan ho yā qafas 'kashfī'
sitam zamāne meñ ham par kahāñ kahāñ na huā
mera KHulus-e-mohabbat bhi kaamran na hua
wo zulm Dhata raha mujh pe mehrban na hua
jabin-e-ishq jhuki hai na jhuk sakegi kabhi
bara-e-sajda agar tera aastan na hua
hai baat kya jo abhi tak khile na lala-o-gul
KHizan ke baad bhi shadab gulistan na hua
teri hansi pe luTa dete chand taron ko
hamare zer-e-asar aaj aasman na hua
wo aae mere tasawwur mein shukriya un ka
zahe-nasib mera jazb raegan na hua
kisi ke ishq ne wo hausla diya mujh ko
koi bhi gham mere dil par kabhi garan na hua
wo aashiyana ho gulshan ho ya qafas 'kashfi'
sitam zamane mein hum par kahan kahan na hua
Source:
Saaz-o-Naghma (Pg. 21)
-
Author:
Kashfi Lucknavi
-
- Edition: 1971
- Publisher: Idara Farogh-e-Urdu, Lucknow
- Year of Publication: 1971
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.