mera mazmun sawar-e-tausun-e-tab-e-rawan ho kar

mirā mazmūñ savār-e-tausun-e-tab-e-ravāñ ho kar

zamīn-e-sher par phirtā hai goyā āsmāñ ho kar

khaTak jaate haiñ chashm-e-barq meñ merā nishāñ ho kar

ġhazab Dhāte haiñ ya.anī chand tinke āshiyāñ ho kar

sun ai josh-e-junūñ taqlīd-e-majnūñ kī nahīñ achchhī

mabādā ham bhī rah jaa.eñ kisī din dāstāñ ho kar

damā-dam sho.abde ham ko dikhātā hai koī jalva

kahīñ shaiḳh-e-haram ho kar kahīñ pīr-e-muġhāñ ho kar

in āñkhoñ se bahār-e-bāġh-e-duniyā dene vaalo

ye āñkheñ rañg lā.eñgī kisī din ḳhūñ-fishāñ ho kar

ajī kyā sham.a kyā parvāna donoñ jal bujhe āḳhir

koī ātish-fishāñ ho kar koī ātash-bajāñ ho kar

ḳhudā mahfūz rakkhe ye hasīñ dil le hī lete haiñ

kisī par mehrbāñ ho kar kisī se sargirāñ ho kar

na paayā aur kuchh bhī juz ḳhudā ka.abe meñ ai 'aḳhtar'

bahut nādim hue ham but-kade se bad-gumāñ ho kar

mera mazmun sawar-e-tausun-e-tab-e-rawan ho kar

zamin-e-sher par phirta hai goya aasman ho kar

khaTak jate hain chashm-e-barq mein mera nishan ho kar

ghazab Dhate hain yani chand tinke aashiyan ho kar

sun ai josh-e-junun taqlid-e-majnun ki nahin achchhi

mabaada hum bhi rah jaen kisi din dastan ho kar

dama-dam shoabde hum ko dikhata hai koi jalwa

kahin shaiKH-e-haram ho kar kahin pir-e-mughan ho kar

in aankhon se bahaar-e-bagh-e-duniya dene walo

ye aankhen rang laengi kisi din KHun-fishan ho kar

aji kya shama kya parwana donon jal bujhe aaKHir

koi aatish-fishan ho kar koi aatash-bajaan ho kar

KHuda mahfuz rakkhe ye hasin dil le hi lete hain

kisi par mehrban ho kar kisi se sargiran ho kar

na paya aur kuchh bhi juz KHuda kabe mein ai 'aKHtar'

bahut nadim hue hum but-kade se bad-guman ho kar