mera raaz-e-dil aashkara nahin

mirā rāz-e-dil āshkārā nahīñ

vo dariyā huuñ jis kā kinārā nahīñ

vo gul huuñ judā sab se hai jis kā rañg

vo bū huuñ ki jo āshkārā nahīñ

vo paanī huuñ shīrīñ nahīñ jis meñ shor

vo ātish huuñ jis meñ sharāra nahīñ

bahut zāl-e-duniyā ne diiñ bāziyāñ

maiñ vo naujavāñ huuñ jo haarā nahīñ

jahannam se ham be-qarāroñ ko kyā

jo ātish pe Thahre vo paarā nahīñ

faqīroñ kī majlis hai sab se judā

amīroñ kā yaañ tak guzārā nahīñ

sikandar kī ḳhātir bhī hai sadd-e-bāb

jo daarā bhī ho to madārā nahīñ

kisī ne tirī tarah se ai 'anīs'

urūs-e-suḳhan ko sañvārā nahīñ

mera raaz-e-dil aashkara nahin

wo dariya hun jis ka kinara nahin

wo gul hun juda sab se hai jis ka rang

wo bu hun ki jo aashkara nahin

wo pani hun shirin nahin jis mein shor

wo aatish hun jis mein sharara nahin

bahut zal-e-duniya ne din baziyan

main wo naujawan hun jo haara nahin

jahannam se hum be-qararon ko kya

jo aatish pe Thahre wo para nahin

faqiron ki majlis hai sab se juda

amiron ka yan tak guzara nahin

sikandar ki KHatir bhi hai sadd-e-bab

jo dara bhi ho to madara nahin

kisi ne teri tarah se ai 'anis'

urus-e-suKHan ko sanwara nahin