mera wajud usi ki visal-gah mein tha

mirā vajūd usī kī visāl-gāh meñ thā

usī kā vird mire dil kī ḳhānqāh meñ thā

tumhāre qaul-o-qasam par fareb kyā khātā

tumhārā tarz-e-amal bhī mirī nigāh meñ thā

hurūf-e-makr tire lab pe the magar zālim

mujhe fareb bhī khānā vafā kī raah meñ thā

tamām sañg-dilī yā ki phir ġhurūr-o-hasham

kuchh aur us ke sivā bhī jahāñ-panāh meñ thā

Tapak ke dīda-e-nam se sadā.eñ detā hai

jo ek harf-e-tamannā dil-e-tabāh meñ thā

mujhe to raas ai 'ḳhālid' yahī zamīñ aa.ī

ye aur baat mirā zikr mehr-o-māh meñ thā

mera wajud usi ki visal-gah mein tha

usi ka wird mere dil ki KHanqah mein tha

tumhaare qaul-o-qasam par fareb kya khata

tumhaara tarz-e-amal bhi meri nigah mein tha

huruf-e-makr tere lab pe the magar zalim

mujhe fareb bhi khana wafa ki rah mein tha

tamam sang-dili ya ki phir ghurur-o-hasham

kuchh aur us ke siwa bhi jahan-panah mein tha

Tapak ke dida-e-nam se sadaen deta hai

jo ek harf-e-tamanna dil-e-tabah mein tha

mujhe to ras ai 'KHalid' yahi zamin aai

ye aur baat mera zikr mehr-o-mah mein tha